CARNOTA AMIGA DA INFANCIA

24/04/19

I Foro debate da infancia e da adolescencia

I Foro debate da infancia e da adolescencia

O vindeiro martes 30 de abril ás 18:00 terá lugar o I Foro - debate da infancia e da adolescencia.

A convocatoria abrese á rapazada e á adolescencia. Este foro ten como obxectivo crear un espazo de encontro entre a rapazada e as políticas e políticos que se presentan as eleccións. Desta maneira, as necesidades e propostas da rapazada teranse en conta para as próximas eleccións municipais. Ademais, nesta tarde presentaremos a placa de UNICEF de Cidade Amiga da Infancia que se colgará na praza do Concello.
A xornada dividirase en tres momentos. Por unha banda, ás 18:00 teremos un pequeno obradoiro coa rapazada (de primaria e de secundaria) para pensar e reflexionar sobre as propostas que lle queremos facer chegar aos candidatos e persoas que forman parte das listas electorais.

Por outra, ás 19:00 teremos unha reunión na que as rapazas e os rapaces terán a oportunidade de conversar e escoitar ás persoas representantes dos partidos políticos que se presentan ás eleccións municipais.

E por último, ás 19:00 presentarase a placa de UNICEF que se colgará na praza do Concello, para así recoñecer a Carnota como un concello amigo da infancia.

Para máis información, non dubidedes en chamar ao departamento de Igualdade e Diversidade do Concello. Tflno: 981 85 70 32. Ext2.

Non deixes de participar, anímate a formar parte deste proceso tan ilusionante. Faite de Carnota Amiga da Infancia e da Adolescencia!

26/02/19

A sesión do Consello do 25 de febreiro

Consello Municipal de Infancia e de Adolescencia

O pasado luns 25 de febreiro ás 12:00 tivo lugar unha xuntanza do Consello no Salón de Plenos do Concello de Carnota.

O alumnado representante de primaria e de secundaria presentou propostas ao goberno municipal, a representantes da oposición e ao persoal técnico de diferentes áreas. A rapazada traballou dabondo e trouxo un abano de propostas e moi boas ideas! ;)

O alumnado do CEIP de Carnota e do CEIP do Pindo trouxo unha maqueta, un plano e unha recompilación de fotografías para explicarnos que é o que menos lle gusta dos seus patios, e que grandes ideas teñen para cambialos! Despois de moitas semanas traballando arreo para pensar como queren mellorar os espazos de xogo tivemos o grande luxo de escoitalas! Pola súa banda, o goberno municipal comprometeuse a valorar as propostas e ter unha reunión cos centros educativos para poñerse a traballar.

As representantes do alumnado do IES Lamas de Castelo tamén tiveron a súa intervención. Neste caso centráronse en cuestións relacionadas con actividades de lecer e cultura.

Ademais traballamos sobre unha pequena dinámica para que a UNICEF teña en conta as opinións da rapazada de Carnota para trasladarllas aos partidos políticos nas vindeiras eleccións municipais galegas.

Seguimos avanzando na participación infantil e adolescente! Comezamos a traballar sobre propostas concretas!

Para máis información, non dubidedes en chamar ao departamento de Servizos Sociais do Concello. Tflno: 981 85 70 32. Ext2.

Non deixes de participar, anímate a formar parte deste proceso tan ilusionante. Faite de Carnota Amiga da Infancia e da Adolescencia!

20/02/19

Consello Municipal de Infancia e de Adolescencia

Convocatoria do Consello Municipal de Infancia e de Adolescencia

O vindeiro luns 25 de febreiro ás 12:00 terá lugar unha xuntanza do Consello no Salón de Plenos do Concello de Carnota.

A convocatoria abrese a todas as persoas representantes que forman parte do Consello: do alumnado de primaria e de secundaria, do profesorado, das ANPAS, de asociacións veciñais, sociais, culturais.
Neste espazo o alumnado representante de primaria e de secundaria terá a oportunidade de presentar propostas ao Pleno Municipal. Deste xeito a rapazada expresa cales son as súas inquedanzas e necesidades, e asi mesmo o goberno municipal e a oposición terá que tomar nota e dar contas.

Pola súa banda, o alumnado de primaria liderará propostas arredor dos patios escolares! Levan moitas semanas traballando arreo para pensar como queren mellorar os espazos de xogo! Que gana de escoitalas e escoitalos! :)

As representantes do alumnado de secundaria tamén terá o seu momento para intervir e expresar propostas. <3

E xa por último faremos unha pequena dinámica para que a UNICEF teña en conta as opinións da rapazada de Carnota para trasladarllas aos partidos políticos nas vindeiras eleccións municipais galegas.

Para máis información, non dubidedes en chamar ao departamento de Servizos Sociais do Concello. Tflno: 981 85 70 32. Ext2.

Non deixes de participar, anímate a formar parte deste proceso tan ilusionante. Faite de Carnota Amiga da Infancia e da Adolescencia!